استقبلنا من خلال خط المساعدة الرقمية، عدد من الاستفسارات مرتبطة بمحتوى منتشر على مواقع إخبارية وصفحات على فيسبوك، وبعد البحث اكتشفنا الترويج ليه بشكل مستمر بداية سنة 2017، بلغات مختلفة من الإنجليزية لحد الهندية، موضوع المحتوى هو مجموعة من الأكواد هتكشفلك إذا كان تليفونك بيتم التجسس عليه أو لا.. في السطور الجاية هنرصد جزء من المحتوى المنتشر وحقيقته.
*#21#
الكود تم الترويج ليه على إنه بيعرفك مكالماتك بيتم التجسس عليها ولا لا.
وظيفة الكود الحقيقية: تعريفك إذا كنت مفعل خدمة تحويل المكالمات من عدمه.
#002##
الكود تم الترويج ليه على إنه بيكافح التجسس اللي كشفه الكود السابق على تليفونك. .
وظيفة الكود الحقيقية:: إلغاء تحويل المكالمات إذا عرفت إنها مفعلة على خطك من الكود السابق.
*#62#
تم الترويج على إن الكود بيكشف الجهة اللي بتتجسس عليك!
وظيفة الكود الحقيقية: بيسمحلك تعرف وتتأكد من الرقم اللي حولت مكالماتك عليه.
- ماذا لو اتصلت بالأكواد واكتشفت إن في تحويل للمكالمات على خطك؟
لو مش انت الشخص اللي حول المكالمات.. ده معناه إن شخص ما مسك تليفونك وتخطى كلمة السر واتصل بكود تحويل المكالمات أو فعلها من خلال إعدادات المكالمات في التليفون. أو تم تفعيل الخدمة عن طريق خدمة عملاء مزود الخدمة.
- هل تحويل المكالمات معناه التجسس والاستماع لمكالماتي؟
لا.. ده معناه إن بيتم تحويل المكالمة من خطك لرقم آخر والشخص اللي معاه الرقم الآخر هو اللي هيستقبل المكالمة لكن مش معناه إنك هترد والشخص اللي معاه الرقم هيسمع المكالمة.
التجسس على المكالمات بيتم بطرق أكثر تعقيدًا من إن يتم كشفها بكود من الأكواد الخدمية السابقة، باختصار أبرز طرق اعتراض مكالماتك والتجسس عليها بيتم عن طريق برمجية خبيثة تم زرعها في تليفونك أو عن طريق اعتراض المكالمات من خلال مزود الخدمة أو من خلال البرج اللي تليفونك متوصل بيه، ودي خطوات مش بسيطة وفي غاية التعقيد.
وعشان تطمن أكتر، تقدر تستخدم وسائل تواصل آمنة زي تطبيق سيجنال للمحادثات النصية والصوتية والمرئية، وغيرها من الأدوات اللي تقدر تتعرف عليها من خلال متابعتك لينا.
